ازاي تختاري العفش المناسب لبيتك؟

اختيار العفش المناسب للبيت من الأساسيات اللي بتمر بيها أي ست في حياتها سواء كانت لسة عروسة بتجهز شقتها أو حتى متجوزة وحابة تغير عفش بيتها. الخطوة دي غالبا بتكون محيرة خصوصاً لو بتعمليها لأول مرة علشان أكيد هيعجبك حاجات كتير ومش عارفة ايه الانسب لديكور بيتك. أو مش عارفة تحددي المعايير اللي على أساسها تختاري العفش. في الحقيقة، الموضوع ده مش سهل وعايز مهارة، خبرة وحس فني  علشان تستفيدي بشكل كامل من العفش اللي هتشتريه. ولأن بيتك هو مملكتك، والعفش هو عنوان جماله وأناقته،

قررنا اننا نقولك على كام نقطة مهمين وهيساعدوكي في اختيار العفش المناسب لبيتك:

1-تحديد المساحات:

 تحديد المساحات ده مش بس بيكون للصالة اوالاوضة اوالأرضيات، ده كمان بيكون للسجاجيد والستائر عشان حجم العفش لازم يكون مناسب ومتناسق مع الديكور. عشان كدة ركزي في النقاط اللي هنقولها دي كويس لأنها هتوريكي ازاي ممكن تستفيدي من المساحات على قد ما تقدري.ولو شقتك صغيرة، استخدمي قطع الأثاث الصغيرة أو الأثاث المصنوع من الزجاج لو مساحة الأوضة صغيرة عشان تدي وسع للمكان.

اشتري قطع اثاث متعددة الاستخدمات زي الكنبة اللي ممكن تقلبيها سرير مثلا أو توسعيها علشان كذا حد يقدر يقعد في حالة لو جالك ضيوف، ودي هتكون اضافة ممتازة للشقق الصغيرة. وبكده هتستفيدي من المساحة الباقية في انك تحطي قطعة أثاث تانية انتي محتاجاها أو حتى تسيبيها فاضية عشان تدي وسع للمكان. االغرف الصغيرة ممكن ميكنش فيها مكتب منفصل للمذاكرة أو للشغل، ناس كتير بتنقل المكتب لغرفة المعيشة وممكن يشيلوه لو جالك ضيوف.

2-نوع الديكور:

اختيارك لديكور شقتك بيعتمد على حاجات كتير، أولها المساحة. يعني لو شقتك مساحتها كبيرة (من 150 – 300) ممكن تستخدمي الديكور الكلاسيك لأنه مش هيأثر أو يقلل من مساحة شقتك بشكل كبير، دة غير انه العفش الكلاسيك بيتميز بقوته ومتناته وتنوع أشكاله اللي بترضي كل الأذواق. ومن أهم أنواعه، لويس ال 16 وال 15 والامبراطوري.

لو شقتك مساحتها صغيرة شوية (100 متر أو أقل) يفضل تستخدمي الديكور المودرن لأنه بيجمع بين البساطة والأناقة وهيدي شكل أوسع لشقتك لأن حجمه بيكون أصغر من العفش الكلاسيك، دة غير انه مرن وسهل تنقليه من مكان للتاني وممكن تدمجيه مع كل الألوان، وبكدة هتقدري تختاري الديكور اللي بيعبر عن شخصيتك.

الزخارف المذهبة بتناسب الديكور الكلاسيكي وبالذات الفرنسي وبتدي شكل مميز للبيت. وممكن تستخدميها في تركيب كرانيش السقف كمان. الكونسول من أكثر أنواع الأثاث اللي بتناسب الديكور الكلاسيكي ويفضل دايما يكون مكانه في مدخل البيت.
العفش الأمريكي وورق الحائط مع الأرضيات الباركيه من أكثر أنواع الأثاث اللي بتناسب الديكور المودرن.

لو عايزة تجمعي بين الديكور الكلاسيكي والمودرن يبقا الزخارف الفضية هتكون الاختيار الأنسب ليكي ودة لأنها بتتميز بالبساطة والفخامة في نفس الوقت.

3-الميزانية:

ودي من أهم الحاجات اللي لازم تحطيها في بالك قبل ما تشتري لأنك على أساسها هتعرفي تحددي لو هتشتري عفش جاهز أو هتفصلي.
لو ميزانيتك كويسة ومستعجلة، اشتري جاهز لأنه هينجزك وكمان هيوفر من عليكي مجهود كبير. وحاولي تشتري دايما من الأماكن المعروفة والمضمونة.
لو ميزانيتك محدودة يبقى التفصيل – عمولة – هيكون أحسن اختيار ليكي لأنه هيساعدك تتحكمي في حاجات كتير زي نوع القماش ولونه والخامات والديزاين ونوع الخشب وتتحكمي كمان في الأسعار. الفرق بس بينه وبين الجاهز أن التفصيل بياخد وقت أطول فلازم تبقي عاملة حسابك من بدري ومحددة انتي عايزة ايه، بالذات لو انتي عروسة.

3-الألوان:

الألوان ليها دور أساسي في انها تبرز جمال الديكور وكمان تعكس الضوء. شكل بيتك بيبقى مختلف وانيق ومميز في نفس الوقت. مهم جدا انك تدّخلي درجات الوان مختلفة مع بعض بس بكميات معقولة علشان يكون مريح للعين. بمعنى انه يكون في تناقض في الألوان بين دهانات الحيطة ولون قماش العفش والسجاد.

لون الدهان الفاتح للحيطة زي الأبيض أو البينك الفاتح بيدخل البهجة للبيت وكمان بيعكس الضوء كويس، غير انه بيناسب كل أنواع الديكور. لكن يفضل انك تستخدمي الوان فاتحة لقماش العفش برضه لأنها هتعكس الضوء بشكل أكبر وتدي وسع وراحة  للمكان.
اللون الوردي من الألوان المبهجة بس مهم انك توظفيه صح.